ಜಾನುವಾರು ಬೆಳ್ಳಕ್ಕಿ

by admin | ಜುಲೈ 16, 2011 | ಓದಿ ಕಲಿ, ಪಕ್ಷಿಗಳು

ಜಾನುವಾರು ಬೆಳ್ಳಕ್ಕಿ

• ಜಾನುವಾರು ಬೆಳ್ಳಕ್ಕಿ (Cattle Egret) ಏಶ್ಯಾ, ಆಫ್ರಿಕಾ, ಯೂರೋಪ್ನಂತಹ ಉಷ್ಣವಲಯ ಹಾಗೂ ಸಮಶೀತೋಷ್ಣವಲಯಗಳಲ್ಲಿ ಕಂಡುಬರುವ, ಕೊಕ್ಕರೆಯನ್ನು ಹೋಲುವ ಅಚ್ಚ ಬಿಳಿ ಬಣ್ಣದ ಹಕ್ಕಿ.

• ಇದರ ಅಗಲ ೮೮-೯೬ ಸೆ.ಮೀ. (ರೆಕ್ಕೆ ಬಿಡಿಸಿದಾಗ), ಉದ್ದ ೪೬-೫೬ ಸೆ.ಮೀ, ಹಾಗೂ ೨೭೦-೫೧೨ ಗ್ರಾಂಗಳವರೆಗೆ ತೂಗುತ್ತದೆ.

• ಬಲಿಷ್ಟ ಹಳದಿ ಬಣ್ಣದ ಕೊಕ್ಕು, ಗಿಡ್ಡಗಿನ ಅಗಲವಾದ ಕುತ್ತಿಗೆ(ಇತರ ಕೊಕ್ಕರೆ ಜಾತಿಯ ಹಕ್ಕಿಗಳಿಗೆ ಹೋಲಿಸಿದಲ್ಲಿ), ಗೂನು ಬೆನ್ನಿನ ನಿಲುವು, ಬಿಳಿ ಬಣ್ಣದ ಗರಿ, ಬೂದು ಮಿಶ್ರಿತ ಹಳದಿ ಬಣ್ಣದ ಕಾಲು.

• ಈ ಹಕ್ಕಿಗಳು ಕೂಡುವ ಸಮಯದಲ್ಲಿ ನೆತ್ತಿ, ಬೆನ್ನು ಮತ್ತು ಎದೆಯ ಮೇಲೆ ಕಿತ್ತಳೆ ಬಣ್ಣದ ಗರಿ ಮತ್ತು ಕಣ್ಪೊರೆ, ಕೊಕ್ಕು, ಕಾಲುಗಳು ಕೆಂಪು ಬಣ್ಣ ತಳೆಯುತ್ತದೆ. ಗಂಡು ಹಕ್ಕಿ ಹೆಣ್ಣಿಗಿಂತ ಉದ್ದನೆಯ ಪುಕ್ಕವನ್ನು ಹೊಂದಿರುತ್ತದೆ.

• ನೀರಿನ ಒರತೆಯ ಬಳಿ, ಮರ ಗಿಡಗಳ ಕಡ್ಡಿಯಿಂದ ಗೂಡು ಕಟ್ಟಿ, ಇತರ ನೀರಿನ ಹಕ್ಕಿಗಳೊಂದಿಗೆ ಸಾಮೂಹಿಕವಾಗಿ ನೆಲೆಸುತ್ತದೆ.

• ಕೆಲವು ಜಾತಿಯ ಜಾನುವಾರು ಬೆಳ್ಳಕ್ಕಿಗಳು, ವಲಸೆ ಹೋಗುವುದೂ ಉಂಟು.

• ಆಹಾರ ಕೆರೆ, ಜವುಗು ಪ್ರದೇಶದಲ್ಲಿನ ಕಪ್ಪೆ, ಏಡಿ, ಪುಡಿ ಮೀನುಗಳೂ ಅಲ್ಲದೇ ಸಾಮಾನ್ಯವಾಗಿ ದನ, ಎಮ್ಮೆ ಮೊದಲಾದ ಜಾನುವಾರುಗಳು ಹುಲ್ಲು ಮೇಯುವಲ್ಲಿ ಹಾರುವ ಕೀಟಗಳನ್ನೂ, ಜಾನುವಾರಿನ ಮೇಲಿನ ಪರಾವಲಂಭಿ ಜೀವಿಗಳನ್ನೂ ತಿನ್ನುತ್ತದೆ.

• ಮೊಟ್ಟೆ ಇಟ್ಟು ಮರಿ ಮಾಡುವ ಕಾಲ, ನವೆಂಬರಿನಿಂದ ಫೆಬ್ರವರಿಯವರೆಗೆ.

ಪರಿಚಯಿಸಿದವರು:  ಪಾಲ  

ಗೊರವಂಕ

by admin | ಜೂನ್ 5, 2011 | ಪಕ್ಷಿಗಳು

ಗೊರವಂಕ, ಮೈನ(Common Myna, Indian Myna) ಎಂಬಿತ್ಯಾದಿ ಹೆಸರಿನಿಂದ ಗುರುತಿಸಿಕೊಳ್ಳುವ ಈ ಹಕ್ಕಿಯ ಮೂಲ ಏಶಿಯಾ. ಸಾಮಾನ್ಯವಾಗಿ ಭಾರತ, ಇರಾನ್, ಕಜಖಸ್ತಾನದಿಂದ ಮಲೇಶಿಯ ಹಾಗೂ ಚೀನಾದಲ್ಲಿ ಕಂಡುಬರುವುದಾದರೂ ಪ್ರಪಂಚದ ಇನ್ನಿತರ ಪ್ರದೇಶಗಳಲ್ಲೂ ಇದರ ವಾಸ್ತವ್ಯ ವಿಸ್ತರಿಸಿದೆ.

Myna | ಮೈನಾ | ಗೊರವಂಕ

ಕಪ್ಪು ಮಿಶ್ರಿತ ಕಂದು ಮೈಬಣ್ಣ, ರೆಕ್ಕೆಯಲ್ಲಿ ಬಿಳಿ ಬಣ್ಣದ ರೇಖೆ, ಕಪ್ಪು ತಲೆ, ಕಣ್ಣಿನ ಸುತ್ತ ಹಳದಿ ಬಣ್ಣದ ಪುಕ್ಕ ರಹಿತ ಚರ್ಮ, ಕಾಲು ಮತ್ತು ಕೊಕ್ಕು ಹಳದಿ ಬಣ್ಣದಿಂದ ಕೂಡಿರುತ್ತದೆ. ಹೆಣ್ಣು ಮತ್ತು ಗಂಡು ಒಂದೇ ರೀತಿ ಇದ್ದು, ಗುಂಪುಗಳಲ್ಲಿ ಅಥವಾ ಜೋಡಿಯಾಗಿ ಕಾಣಿಸುತ್ತವೆ.

೨೦೦೮ರ ಆಸ್ಟ್ರೇಲಿಯಾದ ಸಮೀಕ್ಷೆಯ ಪ್ರಕಾರ “The Most Important Pest” ಎಂದು ಕುಖ್ಯಾತಿ ಪಡೆದ ಗೊರವಂಕ, “100 of the World’s Worst Invasive Alien Species” ಕ್ರಮಾಂಕದಲ್ಲಿ ಮೂರನೇ ಸ್ಥಾನ ಪಡೆದಿದೆ. ೧೮೬೩ -೧೮೭೨ರ ಸಮಯದಲ್ಲಿ ಕೀಟಗಳ ನಿಯಂತ್ರಣಕ್ಕಾಗಿ ಈ ಜಾತಿಯ ಹಕ್ಕಿಗಳನ್ನು ಆಸ್ಟ್ರೇಲಿಯಾಕ್ಕೆ ಪರಿಚಯಿಸಲಾಯ್ತು. ಈ ಹಕ್ಕಿ ಆಕ್ರಮಣ ಶೀಲ ಸ್ವಭಾವದ್ದಾಗಿದ್ದು, ವಾತಾವರಣ ವೈಪರೀತ್ಯಕ್ಕೆ ಸುಲಭವಾಗಿ ಹೊಂದಿಕೊಳ್ಳಬಲ್ಲದು. ಕೀಟಗಳನ್ನು ಧ್ವಂಸ ಮಾಡುವುದರ ಜೊತೆಗೆ ತನ್ನ ಗೂಡಿನ ಬಳಿ ಬರುವ ಇತರ ಹಕ್ಕಿಗಳ ಮೇಲೆ ಆಕ್ರಮಿಸಿ ಅವುಗಳ ಸಂತತಿಗೆ ಮಾರಕವಾಗಿ, ಬೆಳೆ ನಾಷಕ ಪಿಡುಗಾಗಿ ತನ್ನ ಸಂತಾನ ವೃದ್ಧಿಸಿಕೊಂಡಿದೆ. ಒಂದು ಭೂಭಾಗದ ಜೀವಿಯನ್ನು ಹೊಸ ವಾತಾವರಣಕ್ಕೆ ಪರಿಚಯಿಸಿದಲ್ಲಿ ಆಗಬಹುದಾದ ತೊಂದರೆಗಳಿಗೆ ಗೊರವಂಕ ಉತ್ತಮ ಉದಾಹರಣೆ.

ಪರಿಚಯಿಸಿದವರು: ಪಾಲಚಂದ್ರ